தந்தை கருணாநிதிக்கு மகள் எழுதிய கவிதை!

திமுகவினருக்கு கருணாநிதி  தலைவர், அரசியல் வழிகாட்டி, ஸ்டாலினுக்கும் அவர் தலைவர், தந்தை. கனிமொழிக்கும் அவர் தலைவர் தந்தை. ஆனால் கருணாநிதி என்ற தந்தைக்குப் பிடித்த செல்ல மகள் கனிமொழி ‘மௌனம்’ எனும் தலைப்பில் கருணாநிதி பிறந்த நாளில்  எழுதியுள்ள உருக்கமான கவிதை வைரலாகி வருகிறது.

மௌனம்

பேசுவதை நிறுத்தி கொண்டாய்
உங்களிடம் பேசி என்ன ஆகப்போகிறது
என்று நினைத்துவிட்டாயா?
பேசி பேசி அலுத்துவிட்டதா?
சொல்வதற்கு இருந்த்தை எல்லாம்
சொல்லிவிட்டேன் என்றா?
உன் வார்த்தைகளின் எஜமானார்கள்
நாங்கள் என்று உங்களுக்கு தெரியாதா?

மௌனம் கனத்துக் கிடக்கிறது
எங்கள் பாதைகளை அடைத்துக் கிடக்கும்
அசைக்க முடியாத பாறையாய்.
வெடித்துக் கிடக்கும் வறண்ட வயலின்
வரப்பில்,செய்வது அறியாது
நிலைகுலைந்து நிற்கும் குடியானவனைப் போல
நாங்களும் காத்துக் கிடக்கிறோம்
கார்முகிலாய் திரளும் சொற்களுக்காக.

கடல் பிளந்து மறுகரை சேர்கிறேன் என்ற
கிழவனை,பறித்து சென்றது யார்?

உன் சக்கர நாற்காலி உருளும் சத்தம்…
வண்டியில் இருந்து இறங்கி நீ
வீசும் சிநேகப் புன்னகை…
அதற்குப் பின்னால் எப்போதும்
ததும்பும் நகைச்சுவை….
மேடையில் இருந்து, “உடன்பிறப்பே” என்று
அழைக்கும் போது ஒரு கோடி
இதயங்கள் ஒரு விநாடி உறைந்து
துடிக்குமே அந்த கணம்….
இதற்கு மாற்றாய் எதை தருவாய்,
நாளை முதல் சூரியன் உதிக்காது
என்றால் இந்த பூமி எப்படி சுழலும்.

எங்கள் கேள்விகளாய்,தேடும் பதிலாய்
சிந்தனையாய்,சிந்தனையின் ஊற்றாய்,
மொழியாய்,மொழியின் பொருளாய்,
செவிகளை நிறைத்த ஒலியாய்,
குரலாய் இருந்தது நீ.
எங்களோடு தானே எப்போதும்
இருப்பாய்,இருந்தாய்
திடீர் என்று எழுந்துபோய் கதவடைத்துக்
கொண்டால் எப்படி?

உன் நாவை எங்களுக்கு வாளாக
வடித்துக் கொடுத்தாய்
அதை புதுப்பொலிவு மாறாமல்
பாதுகாத்து வைத்திருக்கிறோம்….
இருண்மையும் எதிரிகளும் சூழ்ந்த
நேரத்தில் எங்கள் தோள்களின் மீது
ஏறி படை நடத்திட காத்திருக்கிறோம்….
நீயோ,போதி மரத்து புத்தனைப் போல்
அமைதி காக்கிறாய்.

உன் ஆளுமையக் துவேஷித்தவர்கள்
வசை பாடியவர்கள்
தமிழ் வாழ்வின் தாழ்வுகளுக்கெல்லாம்
நீயே காரணம் என்றவர்கள்
எல்லோரும் இன்று
காத்துக் கிடக்கிறார்கள் எங்களோடு
புழுதிக் காற்று வீசும் திசையறியா காட்டில்
தெளிந்த தடம் காட்டும் உனது
சில வாக்கியங்களுக்காக.

நீ பேசுவதில்லை
ஆனால் நாங்கள்
உன்னைப் பற்றியே தான்
பேசிக் கொண்டிருக்கிறோம்.
வா,
வழியெங்கும் பூத்துக் கிடக்கிறது
நீ வருவாய் என்ற நம்பிக்கை
நீயின்றி இயங்காது எம் உலகு.

கனிமொழி கருணாநிதி

Be the first to comment

Leave a Reply

Your email address will not be published.


*